Tur til Tlahuioltepec!

Torsdag i førre veke pakka me sekken og vendte snuten mot fjella og Tlahuioltepec, musikaranes landsby. Med oss i reisefylgjet var Robert, tolken vår. Etter nærmare tre timar på svingete vegar(minnar om sundalsøra eller skjervet for dei som er kjent med desse stadane) i ein trong taxi var me framme.

Tlahuioltepec er ein liten idyllisk landsby som strekkjer seg oppover bratte fjellsider. At landsbyen er musikaranes landsby var noko me snart fekk merke. Då me tidlegare hadde fått høyre dette såg me for oss koselege gatemusikantar på gatehjørnene som spelte gitar og song romantiske ballader, men den gang ei. Denne landsbyene er kjent for dei ulike korpsene sine som speler høgt, ikkje alltid like fint og til langt på natt.

"Maria Garcia, Maria Garcia telefono para Maria Garcia"! Etter ti minutt i landsbyen vart dette utsagnet ropt ut over høgtalaranlegget som ein høyrde kor enn i landsbyen ein var. Me fekk forklart at dette var fordi dei kun hadde eit par telefonar i landsbyen og når nokon vart oppringt ropte dei opp navnet over høgtalaren slik at personen det gjaldt kunne skunde seg til telefonapparatet. Moro! :)

På biletet øverts til venstre kan de sjå den lokal spelebula, dvs 4 flipperspel som ein visstnok kunne vinne pengar på. Ingvild prøvde dei ut,utan hell.

På førehand hadde me fått vite at me skulle bu hjå ei dame som heitte ms.Nazarea, men det viste seg at ho ikkje var så lett å få tak i. Dette var dessutan den einaste plassen det var mogeleg å overnatte i landsbyen. Medan me venta på at ho skulle komme fekk me eit tips om at me burde reise til rådhuset og presentere oss. Me vart vist inn på eit stort kontor og måtte etter tur og orden skriva oss inn i gjesteboka . Etter det fortalde me kvifor me var i landsbyen og om prosjektet vårt. Me vart godtatt!

Då me kom attende til huset til Nazarea var ho heldigvis på plass og me fekk sjå romma som skulle vere heimen vår den natta. Me kan ikkje akkurat sei at me velta oss rundt i luksus, romma var av svært enkel standard, bebudd av både oss og insekt. Putene til Ingvild og Siri hadde svarte hår som tydeligvis var lagt igjen av dei forrige som hadde sove der. Kanskje ein smule skeptiske og litt skuffa over standarden drog me inn mot "sentrum" for å finne ein stad å ete.

Restauranten Pizzas cowboy vart stamstaden vår. Desverre hadde dei ikkje noko pizza å by på, men veldig gode tacos. Då me spurte om dei hadde kylling insiterte dama som eigde Pizzas cowboy på å kjøpe inn kylling slik at me kunne ete det dagen etter, for ein service!

Den dagen hadde me to intervju, eit med rektoren på den tospråklege skulen og eit med rektoren på ein vanleg skule. Intervjua gjekk greit, men me var litt skuffa over rektoren på den tospråklege skulen då han sat å gjespa og gnei seg i andlete under intervjuet. Me hadde håpe han skulle vere litt meir entusiastisk då grunnen til at me var komen til landsbyen var akkurat denne skulen. Heldigvis fekk me avtalt ein intervju og oberservasjon neste dag.

Kvelden tilbragte me på Pizzas cowboy og på romma(som viste seg "merkeleg" nok å ikkje vere isolert) med meksikanske kortspel som Robert lærde oss.

Natta var veldig kald (kanskje 12 grader) , fylt med korpsmusikk til langt på natt, hanar,kalkunar, hundar og andre dyr me ikkje klarte å identifisere. Det vart ikkje så mykje søvn.

Dagen etter reiste me tilbake til den tospråklege skulen der me vart mottatt av ein lærar som hadde alt det engasjementet som rektoren mangla, og me fekk mykje viktig informasjon til oppgåva vår. Me fekk omvisning på skulen og intervju med elevar. Me var svært nøgde.

Ingvild og Siri hadde eigentleg planar om å vere i landsbyen ein ekstra dag, men på grunn av lite søvn og lite klær bestemte dei seg for å reise heim saman med Jonas, med halen mellom beina.

Besøket i landsbyen vart avslutta med nokon fantastiske gode kyllingtacos på Pizzas cowboy. :)

Alt i alt var alle einige om at det hadde vore ein fin tur, men at ei natt var nok.

I dag reiser me til stranda, Puerto Escondido. Me gler oss stort, skal bli så godt med ferie.

Ellers har me det veldig bra, no skal me ut å nyte den siste dagen i Oaxaca.

Ingvild,Siri og Jonas.